TIRANA NË FLAKË: Plumba gome, automjete të djegura dhe dhjetëra të plagosur në ditën e pestë të revoltës

Për pesë ditë radhazi, Tiranë është qendra e revoltës kundër qeverisë, duke shënuar ditën më të tensionuar të protestave deri më tani. Plumba gome, gaz lotsjellës, automjete të djegura dhe dhjetëra të lënduar ishin disa nga zhvillimet e kësaj shtune. Për afro dhjetë orë, kryeqyteti u perfshi nga përplasjet vazhdueshme mes protestuesve dhe forcave të policisë. Nga Ministria e Arsimit deri Kryeministrinë, tensionet u zhvendosën në disa zona të Tiranës. Nëndhymbërjet policore vazhduan deri në mbrëmje, ndërsa të rinjtë dhe qytetarët kërkuan dorëheqjen e Kryeministrit Edi Rama.

Protesta nisi rreth orës 11:00 në Rrugën e Durrësit, përpara Ministrisë së Arsimit. Orët e para kaluan në një atmosferë të qetë, me momente komunikimi mes protestuesve dhe efektivëve. Një i ri ngriti flamurin autokton mbi murin rrethues të ministrisë, ndërsa të tjerët percollen mesazhe simbolike kundër emigrimit dhe vështirësive ekonomike. Papunesia, pagat e ulëta, qiratë e larta dhe pamundësia për të përballuar jetën ishin ndër shqetësimet kryesore të protestuesve. Studentët folën për vështirësitë e studimit paralelisht me punën, mungesën e perspektivës dhe problemet në sistemin arsimor.

Por qetësia nuk zgjati. Pas mesditës nisi përplasja e para në Rrugën e Durrësit. Një pjesë e protestuesve vendosën kangjella dhe pllaka trotuari në rrugë, ndërsa drejt policisë u hodhën gurë dhe mjete piroteknike. Forcat e rendit ndërhynë me gaz lotsjellës dhe ujë me presion, duke shpërndarë disa herë turmën. Si të mos mjaftonte dhuna dhe gazi lotsjellës, policia nisi të përdorë edhe plumba gome. Efektivët përdorën armë me fishekë gome, ndërsa gjatë përplasjes disa protestues mbetën të lënduar.

Për disa orë zona përpara Ministrisë së Arsimit mbeti në tension. Protestuesit u shpërndanë në rrugicat përreth, por u rikthyen disa herë, ndërsa policia vijoi ndërhynjet me gaz dhe ujë me presion. Pas katër orësh qytetarët nisën marshimin përgjatë bulevardit “Dëshmorët e Kombit”, me destinacion Kryeministrinë. Atje i prisnin kordona të shumta policore dhe automjete ujëhedhëse. Përplasjet vijuan edhe në bulevard, ku policia përdori gaz lotsjellës dhe ujë me presion për shpërndarjen e protestuesve.

Përplasjet vijuan për orë të treta. Policia përdori gaz lotsjellës, ujë me presion dhe shkopinj gome, ndërsa u raportuan edhe shoqërime të protestuesve. Në disa momente, forcat e rendit u tërhoqën dhe më pas u riorganizuan për të ndërhynë sërish. Gazi lotsjellës u hodh jo vetëm nga forcat e vendosura në bulevard, por edhe nga tarraca e Ministrisë së Brendshme. Në shumë momente, protestuesit u gjendën mes reve të gazit dhe ndërhynjeve që vinin nga disa drejtime. Një qytetar u lëndua pranë syrit nga një bombol gazi lotsjellës, ndërsa një protestuese tjetër u shtri në tokë pas ekspozimit ndaj spray-t me piper.

Një episod që ngriti pikëpyetje gjatë protestës ishte ai i ambulancave. Protestuesit denoncuan se automjetet e shërbimit të urgjencës po përdorej për të furnizuar forcat e policisë me gaz lotsjellës dhe mjete të tjera. Dyshimet shkaktuan reagime mes qytetarëve, të cilët ndaluan dhe kontrolluan një ambulanca të mbërritur për t'u dhënë ndihmë të lënduarve.

Tensionet u shoqëruan edhe me zjarre në bulevard. Një automjet me targa franceze u përfshi nga flakët pranë Piramidës, ndërsa një prej automjetëve të policisë mori flakë pas hedhjes së mjeteve djegëse.

Përplasjet u zhvendosën më pas drejt Piramidës dhe urës së Llanës. Në terren mbërritën përforkime policore, ndërsa drejtori i përgjithshëm i Policisë së Shtetit, Skënder Hita, inspektoi nga afër situatën. Një prej momenteve më shqetësuese u regjistrua rreth orës 17:50, kur një protestues i moshuar humbi ndjenjat në zonën pranë Piramidës. Qytetarët e pranishëm iu afruan menjëherë dhe u përpoqën t'i jepnin ndihmë e para, deri në mbërritjen e ambulancës.

Përshkallëzimi i situatës solli në terren edhe forcat speciale RENEA. Rreth orës 18:45, efektivët e kësaj njësie u dislokuan në terren.